政情：280萬元陀飛輪手機抵港

本港奢侈品一向有市場，由法國製造嘅Celsius品牌LeDIX手機，係全球首部陀飛輪手機，售價二百八十萬元，日前呢部身價不菲嘅手機登陸香港，引入LeDIX嘅太子珠寶鐘錶主席鄧鉅明話，內地貴客購千萬手錶都唔使眨眼，一部二百幾萬嘅手機，對佢哋嚟講認真濕濕碎！

身為本港獨家銷售商嘅鄧鉅明同執董朱繼陶日前齊齊推介新手機，據介紹，LeDIX手機好搶手，到港嘅兩部早已名花有主，嚟緊仲有兩部，都畀人預訂埋。鄧鉅明話係意料中事，內地豪客買奢侈品絕不手軟，香港今次獲配十部LeDIX，唔愁賣唔出。

到底LeDIX手機有幾巴閉呢？Celsius行政總裁Edouard Meylan話，LeDIX手機有獨立機械機蕊，部機分別有鈦金屬同碳纖維兩款，屏幕採用藍寶石水晶，全球限量發售十八部。客人亦可選擇喺手機鑲上鑽石，價錢就另議嘞。