政情：高達也出手 撐老友買樓

本港樓價、地價屢創新高，無殼蝸牛望樓興嘆時，立法會議員卻動作多多，喺熾熱樓市中有出有入。一直關注樓市嘅白鴿黨「高達」李永達上月尾向立法會申報，除持有新界區物業外，仲擁有一個九龍區嘅物業；至於專業會議嘅「鼠王芬」梁美芬上月尾則賣出一個港島區嘅物業，穩袋物業升值嘅利潤。議員行為對小市民唔多唔少都有影響，佢哋一個加炭、一個出貨，樓市想降溫都難啦！

鼠王芬出貨 賣港島物業

高達一向係白鴿黨房屋事務嘅旗手，對公私樓發展好關注，仲就發展商賣樓手法、發水規則等提出好多意見。立法會秘書處最新嘅利益申報顯示，高達最近升呢又做「業主」，因為佢揸多咗個物業。

事關高達喺上月二十一號向秘書處呈報喺九龍區擁有物業。我哋聽高達喺立法會批評樓價太高都唔止一次，知道佢又做業主，梗係第一時間恭賀佢啦，點知佢初時反應愕然，跟住立即澄清自己冇再做業主，只係借咗錢畀朋友買樓啫。因為佢有個大學時期嘅朋友想買層二百萬嘅樓，但只能承做五成按揭，所以高達捱義氣借咗五十萬畀朋友。高達承認，個物業係投資用途，但佢本人冇業權，只係因應廣義原則下避免被抽秤，所以先作申報。借錢畀人買樓係咪表示睇好樓市呀？高達就話，佢朋友應該都唔覺樓市會下跌啩！

至於鼠王芬就喺上個月二十一號賣咗層港島區嘅樓，呢段時間樓價一再創新高，一向有投資物業嘅鼠王芬揀呢個時候出貨，一定有斬獲啦！佢過去曾經話過，賣物業通常都係因為睇中另一個更好嘅選擇，唔知今次又睇中邊度呢？