Sun世代：旅業橋王化危為機

旅遊業界近年掀起接班潮，以日本團起家的縱橫遊，亦由袁振寧子承父業，肩負起發揚家族生意的重任。他拒絕以「太子爺」自居，反而按部就班，從領隊做起。日本大地震重創當地旅遊業，但他堅信有危也有機，近日推出超抵價東京團連地震輻射保險，反應熱烈，並鐵定八月再推東北團，為日本送上鼓勵和支持。

袁振寧（CN）○五年擔任縱橫遊業務顧問專責銷售業務，與胞妹袁愷瑩拍住上，齊心搞好父親袁士強所創辦的旅遊王國。不過，他並非一開始就身居要職，打從中學時代起，每逢暑假他都幫手做領隊帶團，可說是從低做起。

「最初父親係做旅遊批發，做過好多專列團（火車團）。最難忘一次帶西伯利亞專列，由香港去北京再去內蒙古，然後去莫斯科同西伯利亞。到達莫斯科時，火車發電卡壞咗，當時係夏天，冇冷氣，啲團友鼓譟，仲話要即刻走！咁點算呢？惟有耐心同佢哋解釋，最終啲客都冇走，但捱鬧就在所難免。」他笑說當時覺得很無辜，但現在回想起來，卻是一次難得經驗。

在英國劍橋大學修讀土地經濟碩士的CN，原來一直的理想並非做旅遊業。畢業返港，他最先是在一間交通規劃顧問公司工作，台灣高鐵的規劃他也有份參與。不過，身為家中一分子，他認為要負起責任，回到縱橫遊的第一項改革，就是提高透明度，「依家客人要求高咗好多，公司會喺客人報團時，盡量提供所有資料，例如要坐幾耐巴士，邊一日住邊一間酒店，我哋都喺單張列明，等客人掌握更清晰資訊。」

首推地震輻射保險

日本大地震「震散」當地旅遊業，CN不諱言這是他接手後遇到的最大挑戰：「做咗咁多年，從未聽過要閂機場，已經意識到今次非同小可，當時臨近復活節，已收咗好多客，但都寧願即時cut團。」有危也有機，今次他學會危機處理，更帶挈了東南亞團，「正如我父親嘅座右銘：一失一得。你失去一樣嘢，也會得到另一樣嘢。」

早前他重臨重災區仙台石卷市慰問生意夥伴，所見所聞令他感動不已：「佢哋差不多個個都失去家人，有啲冇咗太太，有啲冇咗父母，但佢哋好堅強，好快就重投工作，令我好有信心，日本一定冇事！」

日本災情緩和，他最近推出超抵價「2999東京四天團」，反應空前熱烈，六月份的團也幾近爆滿，更首推地震輻射保險，務求給客人信心。他又鐵定八月推出日本東北團，作為對當地合作夥伴的支持。

CN討厭別人視他為太子爺，只想憑真材實料贏得業界和顧客認同。問到未來發展大計，他謙遜地說：「做旅行社最緊要有質素，讓客人覺得物超所值，我唔心急，希望循序漸進發展。」

CN'ｓ Profile

現職：縱橫遊業務顧問

學歷：‧英國劍橋大學土地經濟碩士

　　　‧加拿大滑鐵盧大學城市規劃學士

家庭：已婚，育有一子，次子快將出世

公職（部分）：

博愛醫院總理、香港旅遊業議會出外旅遊委員會委員