政情：搞搞政：白鴿要閂關愛基金水喉

關愛基金籌款傳出爛尾醜聞，政府向立法會申請嘅五十億撥款亦出現小插曲。由於商界唔撐場、民間反對聲眾，搞到啲政黨都唔知企邊邊好，以白鴿黨為例，佢哋一直好想支持，可惜政府又唔爭氣，加上家吓好多資料都唔清唔楚，令鐵頭仁深感兩面不是人，尋日忽然拋出三個條件，態度繼續扭擰，仲威脅政府唔應承就投棄權票。白鴿黨呢一着可以話夠卸膊，又話畀人聽佢哋有份對原方案講唔好，真係面面俱圓。

白鴿黨尋日公開支持關愛基金撥款嘅要求，話政府如果就關愛基金撥款做出三項修訂，包括分三期向立法會申請五十億撥款，聽日先申請住二十億、每季向立法會提交報告，並且安排代表出席相關事務委員會，以及定期舉辦公聽會，畀大眾一個表達意見嘅渠道。鐵頭仁宣布呢三項要求時，強調絕唔可以三缺一，如果政府唔答應，全黨都會投棄權票。

佢又透露，尋日已經喺電話上同督導委員會主席唐英年傾過，對方對分期撥款有保留。其實，財委會投票只要贊成多過反對就搞掂，即使白鴿黨最終全體投棄權，因為有建制派議員支持，撥款基本上肯定過到。