政情：蘇錦樑未夠班解畫推莊
商務及經濟發展局局長喺劉吳惠蘭請辭之後，就一直懸空，局長工作暫時由副局長蘇錦樑署任，近排好多風聲傳政府難搵人，亦令蘇錦樑冷手執個熱煎堆嘅傳聞再起。尋日立法會開大會，有議員跟進團購呢種網上消費新風，不過，蘇錦樑嘅回應就好行貨，更畀人推莊嘅感覺。消委會早前都專登刊登研究，指出團購存在嘅問題，仲有市民受騙個案，尤其係今年首季卻突然急增至十一宗，涉及金額接近十一萬元，立法會議員都感唔放心，追問政府有乜監管？
不過，蘇錦樑嘅答案就毫無驚喜，一陣話舊年已就打擊不良營商手法展開諮詢，一陣又話現行嘅《商品說明條例》已適用網上消費，跟住又話會夥拍消委會進行唔同宣傳及教育，答完等於冇答，靠佢領軍嚟監管團購陷阱真係令人心驚驚！