政情：郎朗獲查理斯頒音樂博士

蜚聲國際嘅鋼琴演奏家郎朗做咗香港人已經五年，年僅廿八歲嘅佢再創威水史，今日會喺倫敦英國皇家音樂學院（Royal College of Music）布理頓劇院，獲頒音樂榮譽博士學位，仲會喺英國王儲查理斯手中接過博士學位證書，呢個殊榮係中國大陸有史以來第一人得到，亦係歷來嘅音樂榮譽博士中最年輕嘅音樂家，真係可喜可賀。

郎朗嘅唱片公司索尼（Sony Music）話，英國皇家音樂學院決定頒個榮譽博士學位畀郎朗，主要原因係郎朗咁多年來喺藝術、慈善、教育領域中，都有傑出貢獻，對年輕一代有深遠嘅影響。其實郎朗自從蜚聲國際後，經常被國際媒體稱為「郎朗效應」，認真唔講得笑。

郎朗喺○八年京奧開幕式嘅八分鐘個人獨奏吸引全球四十億觀眾收睇，佢喺○八年更成立郎朗國際音樂基金會資助同教育優秀嘅琴童，培養未來古典音樂大師。