政情：滙控新班子策略日晒冷
大笨象尋日又有大計，原來係「策略日」嘅構思，又係新任主席范智廉同行政總裁歐智華正式上任後第一次，零舍惹人關注，尋日大約有一百人參加「策略日」，包括分析員，投資者同埋評級機構代表，其中超過五成係投資者，包括頭二十大股東全部到齊，有分析員更千里迢迢由香港飛去英國直擊。
集團高層歐智華、范智廉、集團財務董事麥榮恩面對各種刁鑽疑難都淡淡解畫，表現得自信從容。「策略日」全球聚焦，新掌舵人歐智華想年年搞一次，唔知係咪新人事新作風呢？事關上一次舉行時已經係○七年，而上一次舉行嘅「策略日」只係得兩個鐘，今次就朝九晚七做足全日，簡直破天荒。
滙豐又有獅子銀行之名，原來滙控倫敦金絲雀碼頭嘅總部亦同香港總行一樣，倫敦總部門口都有兩大獅子Stiff同Stephen鎮守。