政情：康叔鐵三角論撐范太做特首

城中炒熱特首選舉嘅話題，早前獲國務院總理溫家寶單獨接見嘅前港區人大代表吳康民繼《誰能維穩，便是「真命天子」》嘅文章後，尋日再下一城，喺報章撰文力撐人大常委范徐麗泰做特首，仲將現時最熱門嘅候選人政務司司長唐英年同梁振英（CY）扯埋一齊，建議唐唐捱義氣繼續做政務司司長，CY則做財政司司長。佢鼓吹呢個「范太坐轎，唐、梁出力」嘅局面，即日已令政圈嘩然。

「三人爭崩頭 不如合作 」

康民叔喺嗰篇題為《2012來個「鐵三角」又如何？》嘅文章，力撐啱啱話要「玩多兩個月」嘅范太坐上特首寶座，話佢有民望，同各方面都冇牙齒印，相信由佢出任，反對聲音唔會太大。康叔又話，前後做咗十年司長嘅唐唐同公務員團隊磨合較佳，建議佢屈就做多屆司長；至於近年動作多多嘅CY，康叔就認為佢有抱負，大可先做一屆財政司司長先「更上一層樓」。

康叔仲話，范太身體唔好，可以只做一屆特首；而唐唐同CY就仲後生，未來五年可以克服自身缺點，五年後再強勢上台都未遲。佢接受訪問時仲話：「與其三人爭到頭崩額裂，不如大家合作搞一個好嘅組合啦！」

白鴿黨張文光認為「鐵三角」性格、作風同派系都唔同，夾硬炒埋一碟，能否維穩都未知，只怕更增政府運作爭拗。特首黑馬人選嘅新民黨主席葉劉淑儀就話，「鐵三角」要組成團隊唔容易，覺得呢個組合太理想化。

被視為唐唐「家臣」嘅工業界林大輝亦覺得呢番言論只係康叔個人意見，唔涉及中央意旨，仲話「鐵三角」合作機會唔高喎。我哋問過「鐵三角」三人嘅回應，三個人都好「齊心」，全部決意唔回應。其實康叔都唔見得有信心，仲話：「出嚟選嘅人，當然要做一哥。我呢啲遊戲文章，冇咩根據，有根據我就唔會咁寫法啦！可能只係我一廂情願㗎啫！」