政情：搞搞政：新界惹火 發叔變夾心人

臨近新界鄉議局換屆選舉，雖然主席劉皇發如無意外可連任，但往後四年任期卻有唔少隱憂，仲要四圍撲火。

相信大家仲記得菜園村搬村風波，唔少村民都收到比市價更高嘅賠償，有咁嘅成績真係多謝晒一班不滿政府嘅80同90後。不過，事件就惹來唔少原居民不滿，有元朗區鄉事派人士透露，事關菜園村收地價較原居民收地高出一大截，據聞就連發叔身邊嘅兄弟都有微言，覺得壞孩子先至有糖食，非常無理，所以要求發叔連任後記得要安撫班兄弟。

再講，早前申訴專員公署批評政府部門對新界村屋僭建物疏於執法，呢位鄉事派人士話現時鄉村好多都係外來人，大部分仲要係泛民主派嘅支持者，所以佢告誡泛民班政客千祈咪諗住抽水批評村屋僭建，如果搞到政府嚴厲執法，佢哋第一件事會要求先清拆外來人嘅新建村屋僭建物，到時睇吓泛民點向選民交代喎。

發叔係行政會議成員，既要幫政府護航，又要維護原居民嘅利益，夾喺兩者之間肯定兩面不是人。