政情：劉燕卿難忘《選擇》「封胸」
消費者委員會總幹事Connie劉燕卿趁住尋日母親節，帶埋媽媽同囡囡上電台接受訪問。講起消委會工作，佢話當年畢業冇幾耐就加入消委會做研究及普查主任，當時每日晨早要落街市做食品格價，最常做就係豬肉同牛肉格價。
佢憶述當時街市檔位冇豎立食品價錢牌，每次問完價都冇幫襯，檔主經常惡言相向，佢坦言已經算好彩，事關當時有個女同事格價時竟然畀檔主潑牛血，依家諗起都覺得對方好慘喎！不過，佢就醒嘞，諗到搵媽媽傍住，每日趁媽媽去街市買餸時順便格價，由於媽媽會有幫襯，所以佢格價時遭受嘅待遇亦好得多。
講起喺消委會三十七年嘅生涯，佢印象最深刻係○六年嘅PAAG注射隆胸大踢爆，因為嗰期調查影響深遠，而該期《選擇》月刊更係唯一一期要包膠袋，所以認真特別喎！
劉燕卿