政情：工商界貪蘇錦樑坐正好恰
劉吳惠蘭辭去商務及經濟發展局局長至今已一個月，但蜀中無大將，搵人填位並唔容易，近日更有傳政府最終焗住要搵該局副局長蘇錦樑頂硬上。
蘇錦樑處理競爭法嘅表現劣評如潮，更因只識耍官腔而搞到同工商界嘅關係勢成水火。不過，如今佢有望上位，最開心嘅竟然係呢班日夜鬧爆佢嘅工商界。
點解工商界一改態度？事關佢哋貪蘇錦樑好恰兼冇公務員撐腰，若果佢坐正，輕則可以逼到佢讓步，重則押後甚至撤回整條草案，對佢哋反而有利。
相反，蘇錦樑所屬嘅建仔就好驚佢坐正，事關佢加入政府後屢爆醜聞，建仔早已對佢失去信心，擔心佢出任局長，必會畀泛民借故留難，拖累建仔喺未來選舉嘅選情。