政情：嫻姐Rap最低工資唱衰勞處

本港首個最低工資實施超過一個星期，勞工處嘅電話熱線平均每日收到一千宗查詢。勞工處電話響爆，皆因條例唔清唔楚，搞到啲打工仔嚇到騰騰震，都唔知條數點計。

係人都知靠政府不如自己做，工聯會副會長陳婉嫻索性自己寫Rap歌，教班打工仔計人工。佢尋日喺大氣電波話依家寫緊首Rap歌講最低工資，仲會搵埋一班音樂發燒友幫手Rap，諗住放上電台播，教班打工仔計人工。佢仲即場Rap畀大家聽，點知唱咗一句「最低工資好易計」之後就唔記得咗。問到首歌幾時出街，佢話最衰今日開始放半個月假充電，睇怕都要佢歐遊完先出得街嘞！

寸卓永興匿埋辦公室Hea

點解嫻姐要親自操刀寫歌？咪多得政府班高官囉。最低工資實施以嚟問題多籮籮，條例又唔清唔楚。嫻姐仲話新法例關乎到勞資雙方，咁多查詢都係正常。不過，勞工處班人唔踢唔郁，佢就建議佢哋落吓區，直接幫班基層勞工，又話︰「工聯會都落區幫班基層勞工計數，一個鐘唔夠就有二十幾個市民埋嚟。勞工處都唔好淨係喺辦公室等人上嚟喇。」佢仲話勞工處可以透過電台、電視台宣傳最低工資點計數，等市民唔使矇查查。

嗱！卓永興作為勞工處處長，肯定責無旁貸，嫻姐擺明係要踢卓永興出門口做嘢喇，點可以仲畀佢匿喺冷氣房歎世界。

一個最低工資政府都搞到一鑊泡。嫻姐就話依家政府啲政策千瘡百孔，好似勞工條例、最低工資已經係一個好好嘅例子，房屋問題又亂晒龍，講到退休保障，佢仲忍唔住鬧「特區政府都冇腦諗嘢！」佢仲話無論邊個想競選特首都好，如果唔思考呢啲問題，必定過半數基層市民出嚟反對喎！