政情：Bernard哥頓勁彈關愛基金
關愛基金籌款鬧出笑話，依家都唔知點埋尾。身兼香港社會服務聯會副主席同樂施會董事局副主席嘅Bernard陳智思，尋日出席一個活動時話，捐錢畀關愛基金其實只係一個選擇，有企業選擇捐錢，好可能只係為咗響應政府，如果商界唔鍾意好似關愛基金呢類咁籠統嘅基金，自然就唔願捐錢，只會捐去心儀嘅慈善項目，仲話自己唔捐錢就係一個實例。
合和實業主席「哥頓」胡應湘尋日都話，佢向來有支持其他慈善機構，捐錢亦有明確嘅執行目標，所以關愛基金都應該要有明確目標，更應一早向外界解釋清楚，唔能夠一廂情願。咁依家點收科呢？哥頓笑笑口話：「不在其位，不謀其政。」