政情：搞搞政：飄色諷邱騰華係災星
環境局局長邱騰華推行嘅好多環保政策都衰收尾，早前宣布要喺石鼓洲興建焚化爐又惹嚟離島居民不滿，結果嚟緊禮拜二喺長洲舉行嘅長洲太平清醮巡遊，邱騰華竟然成為飄色主角之一，仲會以托缽、唸經嘅方式出現，唔通居民要諷刺佢變身和尚仔為自己唸經消災？
呢個飄色邱騰華係由壓力團體「107動力」同長洲居民聯合炮製，雖然只係Ａ貨，但都好反映居民嘅不滿，呢個名為「騰華佛誕祈福求消災行動」，除咗有邱騰華造型飄色外，仲有「大石壓死蟹」嘅諷刺字句，睇怕一行巡遊隊伍，會引嚟唔少關注。
其實，邱騰華之前處理擴建堆填區一事，已同立法會劍拔弩張，之後宣布用成八十億元喺石鼓洲興建廢物處理設施，更遭到離島居民同環保人士不滿，更被質疑分分鐘白白多花六十億元公帑添。
設計圖片