政情：煲呔曾洗腦擦鞋孫公食死貓

教科書分拆個炸彈都未搞掂，教育局又因為旗下一個委員會倡議中小學加入德育及國民教育科陷入四面楚歌。咁多問題未解決，教育局又孭上呢隻「茶煲」，抱病在身嘅局長孫明揚想好過都難。有啲人可能會奇怪點解教育局無啦啦捉蟲，喺依家咁不利嘅時候提國民教育？局中人日前喊苦，話煲呔曾喺舊年施政報告提出呢個措施，教育局都係聽指示行事，呢次真係煲呔曾擦鞋，教育局當災！

推國民教育路難行

今次推動德育同國民教育，教育局嘅角色都好隱晦。局中人強調，呢個建議係回應施政報告，兼由該局成立嘅一個委員會、即「德育及國民教育專責委員會」提出嘅，並非局方主意。不過，個委員會由教育局成立，教育局點可以話冇角色呢？

但係，教育局高官連日嚟都唔肯孭呢件事上身，譬如今日《城市論壇》開壇討論，就由專責委員會嘅成員關穎斌應戰；尋日朝早電台節目，教育局都只係搵咗首席助理秘書長張國華上電台，局方高層唔願上身，結果就係小官當災。

例如張國華呢頭解畫話社會複雜咗，需要整體嘅德育課程配套，嗰頭已經畀教育界學者好唔客氣咁質疑政府旨在「洗腦」，仲有教師加入大合唱，驚惹上敏感事宜又加重工作。依家諮詢工作至啱啱展開，教育局已經面臨咁多人柴台，孫公以後嘅路肯定好難行。

講開孫公，尋日喺一個場合見到佢嘅對手前天文台台長「黑英」林超英，問到孫公病咗，黑英係咪繼續重手時，黑英好理性咁話要「人還人、事還事」，希望孫公健康之餘，亦會繼續向教育局爭取程序公義，即係唔會因為孫公有病而手下留情。