政情：斌仔無障礙暢遊迪士尼
的士係香港常見交通工具，無障礙的士你又聽過未呢？早前成立嘅香港首間無障礙的士「鑽的」嚟緊會同企業合作搞「鑽的慈善旅程」，協助啲身體不便或要使用輪椅嘅人士暢遊迪士尼，屆時四肢癱瘓鬥士鄧紹斌（斌仔）都會同屋企人去玩，推動吓無障礙旅遊。
「鑽的」啟動三個月以嚟，已經接載咗超過二千人次輪椅乘客。個活動喺嚟緊禮拜日舉行，除咗斌仔撐場外，平等機會委員會主席林煥光、立法會航運交通界代表劉健儀同旅遊界代表謝偉俊都會現身，為一眾參加者打氣。
今次入場門券由香港迪士尼樂園捐出，據講參加者坐「鑽的」抵達樂園後，輪椅使用者可直接上落各種機動遊戲同表演場地，體驗無障礙旅遊嘅真正樂趣。本月底，仲會有其他有需要嘅人士獲邀參加旅程，等多啲人可以分享歡樂。