做公眾人物一言一行都要好小心，退下舞台後，就可以隨意得多。前旅遊界立法會議員楊孝華（Howard）告別政壇一排，日前見佢喺天星碼頭嘅隧道出現，一身便裝嘅佢忽然搭隻腳喺鐵欄杆上，懶理周遭行嚟行去嘅人，施施然彎腰綁鞋帶。
久違嘅楊孝華見到我哋後，好開心咁講吓退休生活，透露告別政壇後，基本生活就係玩，成日同屋企人外遊，譬如早排日本大地震時，佢同家人正身在北海道滑雪，嚟緊幾日，佢又會出發到雲南旅遊，遲啲仲會飛過去美國玩番夠本，咁樣飛嚟飛去遊玩嘅生活認真寫意。
楊孝華發現右腳鞋帶鬆咗，即時戙高隻腳彎腰綁鞋帶。
