政情：搞搞政：佳叔拒認做李漢奸民調

被視為政府智囊機構的中央政策組近年頻頻做民調，但評估大型示威人數同政策動向卻一再失準，惹嚟嘥公帑嘅批評，日前更遭立法會議員批評佢哋民調嘅內容離題太遠。尋日中策組首席顧問劉兆佳即刻否認曾經做過無聊民調，又話中策組做嘅民調「已算做得少」，唔認倒錢落鹹水海。

立法會議員涂謹申日前爆料，話中策組曾喺民調問過「李柱銘係咪漢奸？」、「陳方安生係咪忽然民主？」呢啲問題，佳叔尋日矢口否認曾問過呢兩個問題。至於中策組有冇問過財爺係咪應該炒魷嘅調查，佳叔就話政制及內地事務局局長林瑞麟已經講過，所以佢唔會回答喎。自從史上最廢預算案出籠後，鬍鬚曾畀人叫落台嘅聲音震天，政府咁都聽唔到，仲要做民調，擺明冇嗰樣整嗰樣啫！

佳叔仲話，坊間政黨同團體都有做大量調查，而西方政府亦會做大量調查，唔做就唔知真確性。至於中策組做嘅調查包括香港人點睇貧富懸殊、社會政策、勞資關係等問題，佳叔強調，中策組做嘅民調已算少，而且調查多數為內部參考，甚少向外公布。