政情：樓神父女派成績表唱雙簧

有「樓神」之稱嘅趙國雄身兼置富產業信託主席，公司副行政總裁趙宇係佢嘅女，兩父女拍檔打天下係商界一則佳話。尋日置富產業信託公布今年第一季業績，特登揀咗中環IFC商場某個海景酒吧搞酒會暨簡報會，兩父女仲攞現場嚟講笑。

樓神尋日主動同分析員報喜，話上次股東會通過咗擴大投資決議案，畀公司除咗可以投資商場之外，仲可以投資埋寫字樓，日後收購商場項目會多咗彈性。講講吓阿女趙宇加入，仲以點解揀酒吧舉行簡報會打開話閘子，樓神話揀嗰度係「順便嚟睇吓場，睇吓呢個商場值唔值得買。平日嚟好似太高調，依家可以慢慢睇得清楚啲」。

阿女跟住問阿爸點睇酒吧嘅海景？樓神一邊睇一邊指吓外面，表示有少少遮擋，一唱一和下，有分析員加入，話如果收購未必有四厘回報，樓神聞言，即刻向阿女講：「咁你壓吓價啦！」跟住又同個分析員話：「佢壓價得㗎！」一番話惹得哄堂大笑。父女倆首季交出物業收入淨賺1.61億元嘅亮麗業績，旗下商場第一季又平均加租17.4%，難怪佢哋咁開心啦！