政情：米蘭站晒貴手袋派Cup Cake
二手名牌店米蘭站尋日開咗個上市投資者推介會，主席姚君達當然喺度，仲有佢哋招牌貨名牌手袋坐鎮，其中有三個名牌手袋市值共二百萬元，引嚟唔少投資者圍觀，現場仲有名模同藝人江欣燕拎住手袋出場畀人影相，又大派別出心裁印有「米蘭站」字眼嘅Cup Cake，現場氣氛好似開派對咁開心。
呢三個名牌手袋唔小嘢，當然有位身材魁梧嘅外籍保安員守護住，保安相當嚴謹，但一有人埋身影相，保安先生都好識做行開。呢間公司為咗畀投資者留低深刻印象，特別搵人製作咗二、三百個Cup Cake，上面印咗公司名，仲有個手袋仔，食得之餘又得意。
米蘭站投資推介會特別請嚟名模展示女士們熱愛嘅各款名牌手袋，圖中為主席姚君達。