早前都爆料話過位於添馬艦嘅立法會新大樓工程延誤，令到暑假搬屋嘅美夢或會落空，可能要到聖誕節至搬。眨眼間已三個月，立法會主席尋日話，唔會為咗趕搬屋而降低對運作安全嘅要求，聲言如果暑假搬唔成，「合理諗法」係下屆立法會至搬。
立法會一旦要延至下屆搬屋，煲呔曾想喺新大樓宣讀最後一份施政報告嘅圖謀立即被粉碎，甚至出席新大樓答問大會都冇機會。唔單止咁，佢嘅「真兄弟」財爺鬍鬚曾、患腎衰竭嘅教育局局長孫明揚，同埋多位唔再連任嘅議員都冇機會享用新大樓。