政情：搞搞政：孫公Ｄ姐一味拖辣慶官校老師

政府處理問題時成日大耍拖字訣，呢種作風終於辣慶一班向來處事溫和嘅官校老師。由一班官校教職員組成嘅「教育工作人員總工會」尋日去信立法會，嚴詞批評政府拖延處理官校老師薪酬問題。

信中提及，佢哋早喺二○○○年經已以書面方式向當時嘅教育署投訴官校老師嘅薪酬問題，但至今十一年，有關問題仍未得以解決。佢哋同時亦向公務員事務局跟進事件，但發現兩個局嘅拖延伎倆不外乎係「說三道四，答非所問，胡亂闡釋條文」，而最為成功嘅伎倆就係「唔講唔應，一味死拖」，令立法會公務員及資助機構員工事務委員會，至今遲遲未能就議題向局方提出質詢，要求立法會主席運用本身嘅權力，催促公務員事務局喺本月六號召開嘅相關事務委員會會議，詳細交代事件。

單係睇字眼咁辛辣，就知道佢哋今次有幾慶，仲係明踩教育局局長孫明揚同公務員事務局局長「D姐」俞宗怡一樣咁衰啦，睇吓遲啲D姐點解畫嘞！