消防也分化　民怨更難熄

政界傳聞，港英餘孽長年潛伏特區政府伺機搞事，唯恐天下不亂。對照香港當前情況，真係愈睇愈似層層。香江沉淪，社會分化，爭拗無日無之，始作俑者正正就係港府。派錢六千蚊一錯再錯，分化永久性居民同新移民，最低工資紕漏百出，導致勞資關係劍拔弩張，依家連消防員都因港府「挑撥」而出現內部分化。

原來又係派錢派出禍。成件事嘅來龍去脈係咁嘅，消防處上年推出專業職務特別津貼，消防員若能完成相關訓練課程，每月獲得六百幾元或一千三百幾元津貼。錢無人嫌多，處方用錢利誘消防員進修，本來無可厚非，弊就弊在厚此薄彼，負責海防職務嘅消防被「踢出局」無緣參與培訓課程，而陸上消防亦名額分配不均，出現新界區消防較難獲批上堂嘅大細超情況。

開講都有話啦，不患寡而患不均。消防處既然派得錢咯喎，就應該一視同仁，雨露均霑，有啲人有，有啲人無，被拒諸門外嘅自然嬲到七竅生煙，此乃人之常情，處方高層無理由咁都諗唔到。工會直指，津貼政策未能公平實施，源於教官及學員人手不足，惟處方一直未有重視，非但拖慢培訓進度，依家仲令到消防內部分化，嫌隙漸深，真係豈有此理。

更令人擔心嘅係消防處喺人手十個煲六個蓋嘅情況下推行津貼培訓，隨時會影響消防服務嘅效率同可靠性。聽工會講，由於部分訓練課程要喺當值時抽調人手上堂，引致各區不時缺人。以泵車為例，本應每輛要有六名消防員駐守，當抽調培訓人手後，每車缺少一至兩人實屬平常，一旦有大事發生，勢必影響效率咁話。嘩，消防職責事關人命，把守崗位豈容如此兒戲！

太一叮真係唔明白，如果港府財赤艱難，就話改善服務力有不逮啫，現時庫房水浸手頭充裕，點解都搞到民怨四起嘅呢？消防教官及學員人手不足，處方高層為何唔向港府要求增撥資源擴充編制？依家講緊救火救人喎，人命攸關，點到港府闊佬懶理！消防車老化唔換，人手不足又唔增聘，弄致怨聲載道，究竟係處方無正視問題，定係港府高層有人做守財奴，唔肯放水畀消防處「撲火」呢？

話時話，人手短缺問題豈止消防處，公立醫院爆發「醫護荒」早就嗌晒救命，港府一樣如老僧入定，熟視無睹。消防與醫療都關係到市民安危，唔通政府真係要搞出人命先至知驚？到時民怨一發不可收拾，話無港英餘孽喺度搞搞震，真係無人信！叮！