政情：沈祖堯望膠樽絕迹中大
中大校長沈祖堯尋日搞咗個上任以嚟首次嘅公開論壇，佢口快快咁話希望中大冇膠樽。膠樽係學生幫前任校長劉遵義起嘅花名，沈校長係咪踩緊「膠樽義」先？此語一出，隨即刺激現場一眾同學嘅神經，佢怕大家諗錯隔籬即刻補充：「我講嘅係希望校園少啲樽裝水，環保啲！」
其實沈校長上場以嚟自製好多場合同學生聚首，例如喺校長府邸搞BBQ，尋日歷時個半鐘嘅「校長會見同學」公開論壇，學生反而未見好踴躍，坐足全程僅有十幾人。校長又喺會上爆料，話三三四學制令學生增多，校方將同港鐵配合喺大學火車站增加多一個出入口疏導人潮，工程預計下年第三季完工。不過，喺佢上任前鬧得沸沸揚揚嘅新民主女神像嘅永久安放位置，佢就話仲要同學生傾，未有定案。