政情：過來人詩姑問候Rita
商務及經濟發展局前局長Rita劉吳惠蘭患腸癌而辭官，幾年前同樣患腸癌嘅基本法委員會副主任梁愛詩，尋日以樂施會董事局成員身份，幫樂施會推廣樂施米義賣活動時話，知道Rita患病後，有打電話同佢交流心得，至於係咪教佢食得清淡啲同點樣照顧好自己身體，佢就冇詳細講。詩姑話自己近年身體唔錯，飲食習慣同平時差唔多，唔使食素咁緊張。
講起高官頻頻患病，今個月六日突然入院做預防性手術嘅中央政策組首席顧問劉兆佳，如期喺尋日放完病假首日返工。同一樣做預防性手術嘅政制及內地事務局局長林瑞麟高調復工相比，佳叔就選擇低調。究竟佢患乜嘢病？相信普羅市民都好想知道。
詩姑（左）同永亨銀行董事長兼行政總裁馮鈺斌推銷樂施米結緣。