政情：恒生義工陪小朋友製Cupcake
仲有幾日就到復活節，恒生銀行義工隊率先衝入屯門，同一班基層小朋友齊齊裝飾Cupcake慶祝復活節，投資產品業務主管李佩珊仲化身復活兔，同小朋友打成一片。
小朋友聽到有得慶祝復活節已經好開心，仲有得自製復活節Cupcake，更加開心到加零一，其中有位細路女好乖，話會將自製嘅Cupcake送畀爸爸媽媽做復活節禮物咁話。
原來唔單止恒生員工，就連員工家屬都可以一齊參與義工活動。李佩珊話好開心可以同兩個囝囝齊齊做義工，除咗可以同小朋友慶祝復活節，仲可以發揮創意，裝飾Cupcake，見到其他義工同事都出力扮鬼扮馬，令佢非常難忘。
恒生銀行投資產品業務主管李佩珊同細路女合力創製復活節Cupcake。