政情：搞搞政：張文翻舊帳還我清白
尋日前區議員李躍輝賄選判監，立法會教育界議員張文光高呼「還我更大公道、更大清白」，終於沉冤得雪。
點解？事關張文喺兩年前幫黨友助選畀人老屈非禮囉。佢依家仲記得好清楚當時自己明明畀李躍輝嘅助選團包圍，點知對方有人反過嚟屈佢非禮，真係唔嬲就假，結果佢喺沙田田心警署協助調查咗幾粒鐘，唔單止助選不成，更加連飯都冇得食，只有差人送畀佢嘅一個新奇士橙。
佢話事後收到律政司一封信，講明單非禮案所謂嘅證據，根本係完全冇道理嘅指控。有老友仲提議佢反告對方，但佢話冇咁得閒打埋啲無聊官司。
雖然今次李躍輝選舉舞弊罪成入獄同單非禮案冇直接關係，但張文都忍唔住話前年選舉期間李躍輝確有好多令公眾質疑嘅地方，今次判刑證明法律係公正嘅。
