政情：競爭法審議拉布 張國柱難頂劈炮

早前講過立法會雷曼事宜小組委員會，自成立以嚟先後有超過三分一委員退會，反映議員有頭威冇尾陣，當社會對雷曼事件開始失去興趣，佢哋就紛紛半途而廢劈炮唔撈。另一個同樣喺開始時有勁多人入會嘅《競爭條例草案》委員會，最近亦出現同一現象，先後有多人退會。

工商界想拖死競爭法早已係公開嘅秘密，包括不停喺會內同會外大呻中小企嘅難處同草案內嘅技術問題，質疑草案「魔鬼在細節」、「唔可以單憑高官嘅口頭承諾就信政府」等。委員會喺短短不足半年內已開咗十幾次會，部分仲係開足大半日嘅長命會議，審議進度慢過蝸牛。工商界議員擺明喺度拉布，總之一味拖。

工商界勢坐大

委員會四十名委員當中，至今已有十分一、即四名委員先後頂唔順退會，全部都並非直接代表工商界，包括嚟自地區直選嘅陳偉業、梁美芬，同埋嚟自資訊科技界功能組別嘅譚偉豪，以及社福界嘅張國柱，令會內嘅工商界勢力進一步坐大。加上曾經發表「奸商論」嘅商務及經濟發展局局長劉吳惠蘭已因病辭職，副局長蘇錦樑又未夠班同工商界抗衡，形勢對政府愈嚟愈不利。

最新申請退會嘅張國柱，就喺寫畀委員會主席梁君彥封信中大講反話，不點名寸爆以梁君彥為首嘅一眾工商界委員。阿柱聲言喺主席帶領同各委員嘅「盡心參與」下，委員會工作「進度理想」，佢喺大家嘅「細緻討論」中亦「獲益良多」，但鑑於佢有好多其他工作做，委員會現已「人才濟濟」，主席又「領導有方」，佢「幾經思量，權衡利弊」後，都係決定退會唔玩落去嘞！所以話呢，寸人唔一定要火爆，係講技巧o架。