東亞運混帳　庸官仲死撐

混帳年年有，近年特別多。呢，審計署又踢爆港府監管不力，導致○九年東亞運動會盤數一塌糊塗：預算超唔準、超支勁嚴重、餘款到期唔歸還、帳目至今未交代，簡直離晒大譜！

公帑無王管，納稅人氣結無奈，正所謂冤有頭，債有主，呢鋪應該向邊個問責先？叮，審計署有答案：民政事務局局長曾德成。

香港東亞運嘅口號係創造傳奇一刻，最終變成創造混帳一刻。豪擲數以億計公帑，但係你問香港人，對呢項所謂盛事記憶猶在嘅，竟然寥寥無幾，更遑論醒起要向當局查帳。好彩，港府點衰都好，仲有一個審計署喺度，東亞運公司想側側膊？無咁易。

審計署報告係咁講嘅，政府當年向立法會申請撥款，開價一億二千幾萬元，哈，原來只係表面數字，其他部門為支援東亞運額外使多一億三千萬元，即係超支一倍。仲有，比賽場地臨時工程預算六百二十萬元，最後埋單計數，犀利咯，竟然要四千八百萬元，超支六點七倍。難怪有議員形容，東亞運超支好恐怖，市民有如受騙。

市民感覺受騙嘅何止係咁，東亞運尚餘二千幾萬元餘款，本來應該按協議全數歸還庫房。點知運動會都收檔一年幾啦，東亞運公司將呢筆錢袋袋平安，至今未還，更無向政府提交財務報表，期間仲擅自將近千萬元捐咗畀兩個支援運動員發展嘅基金。捐錢係好事，不過咁，不問自取，是為賊也，審計署查完，唔知警方使唔使主動調查吓呢？話晒係納稅人金錢，點可以就咁蒙混過關㗎！

東亞運盤數兒戲過玩泥沙，一切皆因政府失職，監管不力變成無王管，於是咪視納稅人嘅血汗錢如私房錢，鍾意點使就點使。一次不忠，百次不用，港府今年初提出申辦亞運會，預算開支變來變去，一時話幾百億，一時又減至幾十億，嘩，好彩呢個春秋大夢最終因民意反彈而告吹啫，如果唔係，以當局嘅作風咪隨時搞出個千億爛帳亞運會？

難為曾德成尋日仲死撐，否認東亞運超支一倍，仲話唔會影響港府再次申辦大型運動會喎，簡直死性不改。原來成件事數嚟數去最混帳嘅係佢，唔使審計署查佢數簿，就等太一叮代市民叮爆佢喇，叮！