政情：搞搞政：超廢鬍鬚曾拖死沙中線

立法會尋日恢復辯論預算案，由於呢份由財爺鬍鬚曾制訂嘅預算案實在太廢，泛民主派議員提出咗十六項修訂，加埋鬍鬚曾為咗補鑊派錢而提出嘅政府修訂，合共有十七項咁多。

立法會秘書處最初已估計要傾埋今日，先至完成到各項修訂同三讀表決，但根據尋日嘅最新形勢，可能連聽日朝早都要用埋，而原定喺聽日朝早召開嘅雷曼小組委員會苦主聆訊，都被迫暫時取消。

據聞政府非常擔心會議要拖到聽日下晝，令原定一連兩節合共四小時嘅財務委員會會議亦被迫改期。該兩節會議合共有近二十項嚟自唔同政策局嘅撥款申請，當中嘅重頭戲為沙中線、觀塘線延線同南港島線工程撥款，全部由運輸及房屋局局長Eva鄭汝樺負責，而且原先係定喺三月中處理，但因為由勞工及福利局局長張建宗負責嘅新交通津貼計劃搞到一鑊泡，先至延至聽日表決。如果今次又要押後，等於係鬍鬚曾同張建宗拖死Eva，仲累街坊，影響新界東、九龍東同香港島嘅居民。