政情：市民獻計最低工資程式
最低工資條例仲有兩個多禮拜就正式實施，但飯鐘錢同休息日係咪有薪？更改僱傭合約係咪違反勞工法例？僱員放工候召同出外公幹使唔使計最低工資？畀開月薪嘅點計算時薪？好多僱主同僱員到依家仍然係一舊雲。偏偏勞工處早前發出嘅最低工資指引，淨係列舉咗一堆個別例子畀僱主僱員自行參考，數學唔好或者理解能力低啲，都肯定睇唔明。
有市民就不滿政府遲遲未處理好有關問題，自發設計咗一套計算最低工資嘅電腦程式，再電郵畀各名高官同立法會議員參照。僱主僱員只要自行輸入每日嘅上落班同用膳時間、有冇請過假同請邊類假、有冇雙糧同花紅等，即能計算出時薪係高過定低過廿八蚊，非常方便。其實程式原理非常簡單，只涉及加減乘除算術，點解政府會做唔到呢？