政情：絕育放生黃宜弘不敢狗同
白鴿黨「肥仔明」李華明不滿漁護署淨係識捉貓狗去人道毀滅，而唔係先幫佢哋絕育再放生，尋日喺立法會辯論預算案時要求刪除該署轄下捉狗隊嘅預算。佢開宗明義話提修訂只係政治表態，但建制派就群起反對，中總代表「IQ博士」黃宜弘仲發炮大鬧白鴿黨，話佢哋未諮詢過貓狗意見就建議先將佢哋絕育再放生，其實係「漠視狗意」喎！
諮詢貓狗論一出，議事堂即時議論紛紛，唔明點樣諮詢貓狗，唔通要班狗仔贊成吠一聲，反對就吠兩聲？抑或好似早前網上熱爆嘅片段咁，請動物通靈師去了解貓狗意見？但IQ博士冇解釋就結束發言。
就連食物及衞生局局長周一鑊都借貓狗過橋，話自己試過收養一隻喺車底發現嘅流浪貓，如果立亂拎佢去絕育，佢可能都唔會開心喎。
周一鑊點知貓仔嘅意願？唔通佢識得通靈？
IQ博士忽然代表貓狗嘅利益，話要諮詢佢哋嘅意見。