政情：商界睇死冇得升當蘇錦樑透明

上周商務及經濟發展局局長Rita劉吳惠蘭突因腸癌辭官，正處於逐條審議階段嘅競爭法條例草案，處境更令人憂心。眾所周知，一眾商界議員早於條例審議初期已同政府對着幹，負責做推銷員嘅副局長蘇錦樑長期處於捱打狀態。外界一直擔心Rita離場後，班商界議員將變本加厲，甚至趁機拉倒競爭法。

「競爭法傾嚟有乜用」

由於蘇錦樑嘅表現不濟，自條例審議以來都處於捱打狀態，有啲議員甚至會越俎代庖，直接同Rita或該局副秘書長黎蕙明交涉，最佳例子就係早前四大商會罕有地聯手約見Rita表達對競爭法嘅疑慮，可見蘇錦樑雖掛名主理草案，其實早被架空。

有商界議員笑言，Rita辭官反而畀機會佢哋抖抖氣，皆因佢哋認為蘇錦樑雖暫時署任局長，卻冇實權，量佢都唔敢喺呢段時間就競爭法作任何讓步，「傾嚟有乜用？對手都唔喺度，喺度嗰個又話唔到事」！佢哋認為如今最好按兵不動，等新局長上場再算，話唔定新任局長係商界老友，大家坐埋有偈傾。

商界議員咁講，擺明睇死蘇錦樑冇得坐正，即使連支持競爭法嘅泛民主派議員，亦同樣睇死蘇錦樑。草案委員會副主席尋日話競爭法現時審議情況嚴重落後，又冇人壓得住場，希望政府可以派出更高級頭目，例如煲呔曾或政務司司長唐唐出嚟開腔撐競爭法，幫吓處於弱勢嘅蘇錦樑造勢喎！無論撐嘅或反對競爭法嘅議員都暫時休戰，好明顯係覺得蘇錦樑太弱雞，不屑同佢打落去，免得嘥力氣同彈藥。