小販牌照應重發 整肅官場臭豆腐

港府又揚威海外喇！食環署玩殘「雞蛋仔阿伯」吳旭輝唔止激起全城義憤，連美國有線電視新聞網CNN都有跟進報道，署方點樣冷酷無情欺凌老弱，點樣針對性執法趕絕良民，一一公諸於世無所遁形。拉完雞蛋仔阿伯，食環署變咗「官場臭豆腐」，又一次臭名遠播！叮！

港府無道，人間有情。雞蛋仔阿伯被食環署小販管理隊「拉人封艇」，引發全城關注，各界人士紛紛出謀獻策，想幫吳伯一把，有人捐錢，有人提出聘用吳伯，亦有人願意提供律師義助打官司等等，令人動容。不過太一叮相信，政府部門裏面嘅官僚動物對呢股香江暖流唔會有乜感覺，事關佢哋慣咗匿喺冷氣房蛇王，已經被冷氣吹得愈嚟愈冷血僵化。

太一叮提醒高官一句：民意不可欺，民情更加不可侮。港人聲援雞蛋仔阿伯、狂插食環署嘅炮火至今仍然轟轟隆隆，單睇facebook「撐雞蛋仔伯伯」群組，短短幾日已經累積至三萬五千名網民響應，星星之火愈燒愈烈，正向燎原之勢發展。計太一叮話齋，呢股全城力撐雞蛋仔阿伯現象，既係市民仗義執言嘅自發表現，更係官逼民反、港人民怨即將大迸發嘅徵兆。

官僚禍港，民不聊生，貧富懸殊嚴重，官民關係惡化，基層百姓嘅容忍度已達臨界點。一個七十四歲嘅老人家唔想靠綜援度日，以賣十蚊一底嘅雞蛋仔餬口，苦撐五口之家，竟然都被食環署趕絕，市民睇到唔慶就假。於是，市民積壓已久不滿港府無道同官員無能嘅怒火，一見有宣洩口就迸噴爆發。港府依家坐正喺火山口，災難幾時爆發，真係無人話得埋！

講開又講，官場臭豆腐一向臭名遠播、惡名昭彰，外表硬淨有棱有角，內裏其實全部豆腐渣，外強中乾，欺凌弱小。平時揸住雞毛當令箭，捉老翻檔、偵查毒帶子唔見佢哋咁有效率，捉手無縛雞之力嘅老弱婦孺就惡言厲色神勇過人。有網民怒吼，要求呢個垃圾部門收檔，慳番啲公帑幫窮人，都算真知灼見。

話時話，港府高層對今次雞蛋仔阿伯事件若然熟視無睹，麻木不仁，後果難以預料。其實，○九年食環署意圖鐵腕取締中環戲院里嘅擦鞋匠，當時觸發民意反彈，港府最後都低頭發牌啦。

計太一叮話齋，今次港府亦應該借此契機，檢討重發小販牌照，搵地方闢設小販專區，畀吳伯一類人士自食其力，如果再繼續高高在上，懶理基層死活，民怨好快大爆發o架咋！叮！