政情：柯為湘愛女講業務熟書
九龍建業主席柯為湘女兒柯沛縈，喺公司做市務及銷售部總監，尋日佢首次同傳媒會面，談吐大方得體表現絕不怯場。
唔好以為富二代就可以懶懶閒奉旨「世襲」，柯沛縈入行經過並唔簡單，佢話以前喺英國讀學士同碩士學位，返港後做過資訊科技同公關，最近兩三年先返公司幫手，最初喺保利達從事能源有關業務，又負責過始創中心嘅租務，最後順理成章喺舊年入咗市務及銷售部幫手。
佢話今年底至明年初會推出港島卑路乍街、九龍西洋菜街同麥花臣球場附近三個項目。仲話集團同旗下保利達喺內地同澳門都有項目發展，不過就有其他同事負責。連唔屬於自己範疇嘅業務都咁清楚，真係做足功課喎。
除咗呢位乖女喺公司幫手之外，柯為湘個仔柯沛鈞已經入咗九建幾年，喺○五年九月升做執行董事，負責發展企業策略、企業規劃同埋日常管理工作。
柯沛縈對公司業務瞭如指掌。