政情：任總開講學費一舊水益街坊
一直對人民幣國際化有好多想法嘅任志剛，離任金管總裁至今，起碼寫咗十幾篇相關文章或演辭，上個禮拜亦有新作，寫都唔夠，下個月二十四號喺中大開壇，再講中國貨幣及匯率政策。據老友話，一日之內已有半百人士報名上堂，非常踴躍。
其實中大喺舊年已公布咗，中大全球經濟及金融研究所會舉行全球金融菁英領導研討班，專畀金融及監管機構等高層主管參加，主講嘅包括任總、中大前校長，依家係中投香港董事長嘅劉遵義，同埋幾位諾貝爾經濟學得獎者，但呢個課程學費認真昂貴，短短二十一堂嘅五日半課程索價八萬蚊，兼且唔係有錢就讀得，要揀過至有資格。咁今次任總一個講晒，只係收一舊水，係咪明益街坊吖！