政情：白鴿黨民協Hea住扮激
遊行示威愈搞愈激，日前又有基層社民連成員撒溪錢搶高官咪反對港鐵加價，不論係咪所有市民都受落，最少都博到傳媒曝光機會。為免喺嚟緊嘅區議會選舉蝕章，連向來相對溫和嘅泛民政黨白鴿黨同民協都忽然扮激。
五名白鴿黨成員尋日大清早到咗政府總部門外，準備向喺裏面開會嘅行政會議抗議港鐵加價，但其後佢哋投訴行政署遲遲唔畀佢哋入內，又話要求特首親自接收請願信，突然變陣坐晒喺政府總部近下亞厘畢道汽車入口，但佢哋好快就接受勸喻返入指定示威區。
同白鴿黨一樣支持咗政改方案嘅民協，尋晚又無喇喇派咗幾名成員去瞓街，但今次係瞓立法會請願區，要求政府復建居屋。其實立法會今早十一點先開始恢復二讀預算案，預計到聽日先完成三讀表決，點解唔遲一晚先走去瞓街同包圍立法會呢？真係令人費解囉！
白鴿黨五名成員突然喺政府總部外坐地示威，但好快就返番入指定示威區。