政情：批博低票當選 棠哥鬧自己

選舉年殺到，各政黨都出盡渾身解數。好似工聯會會長鄭耀棠咁，尋日就喺電台發炮，話依家愈嚟愈多人喺遊行或趁官員出席公開活動時做出激烈行為，甚至喺議會內掃枱掟蕉，擺明係想博出鏡，暗地裏為選舉造勢，爭取少部分激進人士支持，可以憑着百分之五至八嘅少數支持躋身立法會，槍頭擺明指向社民連同人民力量。

熟悉香港政治嘅朋友會好清楚，如果單計民主選舉，泛民同建制派總得票係「黃金六四比例」嘅現象，即係泛民主派通常會取得約六成議席，建制派就得四成。回歸前，當局為咗確保建制派唔會喺選舉中全軍覆沒，專登揀咗比例代表制嘅選舉方法，話就話可以令獨立人士同細黨派公平參與選舉，實際就係要保住建制派唔會輸得太可憐。

各黨爭五新增直選議席

山不轉路轉，泛民眼見比例代表制對佢哋不利，部分細政黨開始利用呢個遊戲規則，博以低票入局，好似人民力量「大舊」陳偉業咁，○八年所得票數雖然僅得百分之八點三，但都拎到新界西最後一席，而同年工聯會王國興都係用同一招數，比大舊拎多三千幾票，低票入局。

出年立法會選舉增加直選名額，唔少政黨都對五個議席虎視眈眈，其中現時功能組別勞工界代表、同屬工聯會嘅葉偉明同潘佩璆，佢哋喺舊年開始已經喺新界東同港島設立辦事處，打嘅如意算盤就係每區最後一席，希望可以用最少工夫贏到最多議席，同樣係鑽比例代表制空子。

雖然社會未必個個認同激烈行動，但棠哥鬧得興起，好似完全唔記得咗，工聯會都係睇中採用比例代表制，想派人參選五區博取各區最後一席。

以現行遊戲規則為自己爭取最大利益係無可厚非，既然大家都用同一策略，棠哥咁批評對手，除彰顯佢有口話人冇口話自己外，咁亦都等同將底牌騷埋畀對手睇，損人不利己，犯咗從政者大忌。