教科書價超貴 皆因港府無能

官僚顢頇，放任自流，出版商食水深，教科書年年加價，搞到民怨沸騰。食水點深法呢？消委會有數據參考，真係唔睇猶自可，一睇把幾火。

港府以自由經濟為名，翹起雙手乜都唔做，結果香港唔止樓價冠絕全球，教科書一樣開天索價，價錢之高區內難出其右。消委會調查發現，本港小學中英數三科教科書嘅平均售價，竟然係廣東嘅九點三倍，係台灣嘅四點八倍，簡直令人咋舌。有人形容，香港家長被書商住嚟搶，一啲都唔誇張。

書商可能會反駁，香港生活水平高，書價唔能夠同內地、台灣相提並論。嗱，消委會有備而來，調查埋生活指數同香港差唔多嘅新加坡，結果點呢？香港教科書價格係星洲嘅兩倍。書中自有黃金屋，唔通香港教科書真係鑲金嘅，所以零舍貴過人？

叮！梗係唔係啦！香港教科書之所以一「本」萬利，市民任人魚肉，歸根究柢，係港府零舍衰過人就真。書商斂財有恃無恐，全因長期壟斷市場，而港府卻撒手不管，聽之任之，咪變相縱容，令其坐大囉。好嘞，依家養虎成患，民怨四起，官員先至發茅補鑊，夾硬要書商分拆教材出售，以降低售價喎，點知書商唔賣帳，仲反過來單方面宣布加價半成，明剃跛腳鴨政府眼眉。

計太一叮話齋，港府呢次被書商狠摑一巴掌，根本就係自取其辱，與人無尤。係人都知，香港教科書市場畸形，學校選書不問價錢，家長付鈔無權置喙，書商操控價格早就立於不敗之地。教育局副局長陳維安尋日仲繼續為分拆教材同書商糾纏，拉鋸於係咪只局限新版書籍，根本就係嘥聲壞氣，捉錯用神。

其實，書商之所以敢年年漲價，對家長予取予求，皆因市場欠缺競爭。社會輿論早就提出，港府應該效法內地或日本等地，將教科書收歸官辦；又或者制訂政策，放手學校聘人自訂教材，免費派發給學生。如果港府擔憂介入教科書製作，會觸碰某啲政治敏感問題，則大可假手大學機構代辦統籌。無論點都好，任何藉口都唔能夠成為高官袖手旁觀，任由書商蠶食家長荷包嘅理由。

講到底，防止書商魚肉家長，辦法唔係冇，而係港府唔想做嘢啫。好似隧道加價咁，經常引起爭議，挑起社會矛盾，好多人要求港府盡快回購東、西兩隧，平衡車流，港府咪又係船頭驚鬼船尾驚賊唔肯做，任由車主被宰、市民飽受塞車之苦。唉，今時今日，做香港人真淒涼！