政情：搞搞政：李本瀅四寶陪退休

天文台台長近年頻頻換人，接手冇耐嘅台長李本瀅嚟緊禮拜三就退休，尋日佢出席一個電台節目時講到未來嘅生活，佢話唔會再從事賺錢嘅工作，可能會做啲同教育同慈善有關嘅事，又用一副知足常樂嘅口脗，形容退休只要有四寶就夠嘞。

李本瀅話，退休時最緊要有以下幾樣嘢：「一個有瓦遮頭嘅竇、一個老伴、一個書櫃同埋半樽酒」，咁就已經足夠，仲話有以上四樣嘢相伴餘生，已經好快樂。

擔任天文台台長期間一直風平浪靜嘅李本瀅，喺臨退休前遇上日本大地震同核輻射危機，最近周身唔得閒，佢尋日有感而發話，日本核事故令社會更關注再生能源問題，仲語重心長咁叫市民改變生活模式，減少浪費，又話自己退休後都會奉行簡單嘅生活，「我哋消費其實太犀利，你睇吓有幾多廚餘、幾多廢物，一個人需要幾多呢？其實需要好少之嘛，你計一計卡路里，好可能一日食兩餐其實已經足夠，根本唔使三餐咁多添。」