政情：陳有慶嘆泰國米難撈
通脹高企，柴米油鹽樣樣都加價，家族生意有經營泰國米嘅陳有慶，日前都大嘆米嘅生意愈嚟愈難做，尤其喺越南米夾擊下，令佢哋壓力幾大。
陳有慶話，香港人一向好鍾意泰國香米，曾幾何時，泰國米佔本港食用米市場超過九成，近年卻逐漸下降到五成。佢解釋，泰國米近年價格高咗好多，不過，香港人千祈唔好以為食貴米，事實係本港出售嘅泰國米分分鐘平過當地，所以香港真係福地！
點解泰國米佔市場嘅份額一路下降呢？佢解釋，越南米對泰國米嘅競爭愈嚟愈大，因為越南米係混合米，價錢自然會平啲，但論入口嘅感覺，陳有慶就認為泰國香米始終勝一籌！
