政情：陳繁昌夫婦同數字有緣
科大校長陳繁昌係數學專家，一世人都同數字打交道，佢太太就係財經界人士。科大前日喺會展舉行二十歲生日派對，太太同佢一同出席，陳太話佢同丈夫各有各好，不過，大家嘅工作都同數字有關，只係數字後面代表嘅嘢唔同。
陳太呢個講法都幾得意，佢喺美國返港後，打算學啲新知識，諗緊嘅包括普通話同打字，又計劃做義工，因為佢喺美國都有做開。
呢一晚係科大嘅大日子，中國科學院南京紫金山天文台將一粒編號202784嘅小行星，命名為「港科大星」，紫金山天文台副台長魯春林專程來港頒發紀念牌同證書畀科大。前任校長朱經武都有出席，佢卸任後返咗美國，唔通今次專程返嚟賀科大？
陳繁昌同太太有各自嘅數字人生。