政情：陳淑莊整生菜包頂呱呱
名人入廚樂近年成為電視台遊戲節目主要題材，政壇人士不時獲邀請公開示範廚藝，公文袋嘅陳淑莊（Tanya）更係常客之一，尋日佢同另外五個議員又參加一個烹飪比賽，再次做廚藝冠軍，唔講唔知，佢前年已經做過一次冠軍。
尋日嘅活動由扶康會同中電合辦，每位立法會議員都要夥拍一位智障人士參賽，議員入廚手勢點？街工梁耀忠就好麻麻，差啲煎燶晒啲雞翼，好在佢拍檔醒目提醒佢至冇事。
Tanya就整泰式生菜包，賣相香氣都一等一。原來佢會考有考家政，成績係點佢就唔記得嘞，不過肯定唔會低過C喎。Tanya仲話自己平日都極愛食泰國菜，不過就好少煮，近年鍾意煮意粉多啲。
陳淑莊煮嘢食咁拿手，梗係順利贏出比賽啦。