政情：周一鑊煲呔曾遲落閘捱轟

港人民怨沖天，唔少人喺網上討論區發難，樓價同內地孕婦來港生BB成為兩大熱門論題，兩大問題不約而同反映內地人湧港、令細小嘅香港被逼爆同炒爆，呢啲困擾已經唔係短時間，食物及衞生局卻一直懶理產科爆棚嘅問題，拖到近日，局長周一鑊至轉軚向預約來港產子嘅非本地孕婦「落閘」。至於熱爆嘅樓市政府仍然話之你。有網民大鬧政府不知所謂，直言內地人多財多，到港府諗起閂閘時，度門可能已經逼爆，到時後悔都冇用。

內地孕婦嚟香港生BB嘅數目，近年已經佔本地新生BB三分之一，搞到以七百萬港人作公共服務規劃嘅小香港備受衝擊，公立醫院前線醫護人員不堪工作壓力雞飛狗走，香港日前宣布要向內地孕婦截龍後，本地網民轉貼咗內地孕婦嘅不滿言論，結果引起好多港人不滿，喺網上怒斥內地孕婦來港佔用本港醫療資源，又話政府高官反應遲鈍，畀人佔咗便宜仲要捱鬧。

港官唔知為邊個服務

唔少網民直斥周一鑊等高官唔識早啲落閘阻止內地孕婦，有人更話：「劍橋、哈佛等學府，學位都主力留畀本國人，只係留少量畀外國人。」質疑港府點解到產科癱瘓至做嘢？

周一鑊嘅劣績未講完，網民又數本港樓市都畀內地人炒到爆，唔明白官員點解唔可以限制內地資金嚟香港？有網民更鬧「曾蔭權拒絕建居屋，上年還說豪宅樓價不會影響二手樓……原來政府在後面不斷放內地人來炒樓」，直斥港府官員唔知為邊個服務。亦有人話香港正不斷沉淪，一眾高官已經集體病入膏肓，無視內地居民對本港經濟、社會造成嘅影響，再咁拖落去，香港真係唔沉都難。