書商拒絕分拆 港府顏面無存

港府管治威信蕩然,依家連無牙老虎都不如,簡直係病貓一隻。呢,內地孕婦湧港產子潮愈演愈烈,公立醫院婦產科面臨崩潰危機,港府發茅補鑊,日前召集私家醫院代表商討減收內地孕婦,點知遭業界斷然拒絕,碰到一鼻子灰,狼狽丟架至極。

叮!福無重至,禍不單行,當局勸喻教科書出版商分拆教材出售,以降低售價,拉鋸兩年多,出版商公然反枱,唔單止當政府嘅勸喻係耳邊風,更大幅加價,最高加價達一成添,病貓政府又被人剃眼眉。

耶穌教化世人,有人打你左邊面,連右邊面都湊過去,但一個政府短短時間被私家醫院同教科書出版商連環狠摑兩大巴掌,唔係顯示寬仁,只係反映權威蕩然,管治無力。人無信不立,官無信不威,港府失威至此,無信如斯,日後仲能否維持有效管治,真係好成疑問。唉,最慘嘅係官僚窩囊,最終受害嘅又係普羅市民。

內地孕婦來港產子衝擊本港婦產科服務,乃公共醫療系統心腹大患,而教科書加價,則係萬千家長嘅眼前之愁。有家長控訴,新高中學制下,教科書開支沉重難當,通識教科書賣八百元,經濟科課本一套六冊,每冊由一百九十元至二百三十元不等,家有三名子女就讀小學及中學,新學年買新書就耗費一萬二千元,長此下去快要斷擔挑!

事實上,教科書年年漲價,家長人為刀俎,我為魚肉,一切都因政府無能所致。教育局官員以為透過分拆教材出售就可降低書價,根本係一廂情願,太傻太天真。正如好多分析所指,香港教科書係一個畸形市場,學校選書不問價錢,家長付帳無權置喙。首先,姑勿論當局能否成功迫使書商分拆教材出售,就算成功,書商仍可以藉口改版、經營成本增加以及市場變差等等,企硬唔減價甚至加價,家長又奈若何?計太一叮話齋,市場遊戲規則唔改變,家長嘅重擔難望減輕。

咁遊戲規則點改好呢?其實,早有人提出何不倣效內地等做法,如果書商唔願製作價廉樸素嘅教科書,政府大可取而代之,由編纂、印刷到出版一手包辦。再唔係就扮演統籌角色,透過招標規限書商嘅成本價格,只有咁樣市民先至唔使被書商捏住喉嚨做人。問題係,港府有呢份魄力同決心嗎?

一書之不治,何以天下國家為?港府連教科書價格問題都無力處理,靠佢管治好香港,簡直難以登天!

「Money18免費即秒股票報價網站」現推出8升級功能,財經資訊,實時實發!