Sun世代：嬌滴女總裁 藉著保險傳揚愛

保險是一門「人」的生意，周詠姬深信當中包含了對親人的愛與責任。她是大新人壽行政總裁，在保險界打拚近二十年，曾在多家國際保險公司擔任要職，最終選擇在本地公司大展拳腳。她希望藉着保險，將愛的訊息傳揚開去；又以身作則，鼓勵同事做好本分，發揮香港精神。

周詠姬（Eleonore）的聲線如銀鈴般清脆，加上甜美的笑靨，令人很受落，但她說話斬釘截鐵，絕不轉彎抹角，這大概能反映出她的個性—在嬌滴滴的外表底下，擁有志比天高的事業心。曾在英國保誠、AIA、蘇黎世等大型保險公司任職，又曾長駐台灣和上海等地，Eleonore早就練成獨立個性，「前後有五年唔喺香港，經常台灣、大陸周圍飛，真係捱過唔少苦㗎！」

台灣受日本影響深遠，對保險的認知很高，sell保險相對着重產品特色，而內地則要在教育方面多花心思。不過，溝通才是Eleonore遇到的最大難題：「一樣係講國語，台灣同內地嘅口音已經好唔同。另外，台灣傳統係男性主導，我當時派去當地工作，成個部門有一百人，一個女性主管都冇，under我嘅全部係男性。」她主動和下屬溝通，坦誠接納意見，用柔情化解隔閡。她笑說：「我同佢哋講，我只係將自己識嘅嘢帶嚟，並唔係要否定佢哋，而且畀佢哋多啲機會去發揮。」

「呢行令人愈做愈後生」

去年七月，Eleonore加入大新人壽，由國際公司跳入本地公司，原因是發揮空間很大。她上任後第一件事，就是為大新重新定位，「想將大新呢個品牌年輕化、活力化，唔係要爭住做市場上嘅一哥，亦唔會同人鬥，現階段只要做好自己本分就可以，我都係咁要求同事，唔會畀佢哋太大壓力。」

最近推出連串宣傳攻勢，Eleonore找來「亞洲車神」黃金寶、超級巨聲冠軍林欣彤、「奶茶王」賴旺明做代言人，「佢哋都係唔怕挫折，唔理外間批評，每日堅持做好自己，呢啲就係香港精神，同大新好配合！」

Eleonore計劃在未來半年，隔月推出新產品，例如最近推出的「甜蜜十六歲」女性危疾保，便是其代表作。她侃侃而談：「呢個計劃cover咗五十二種疾病，算係市面上cover最多嘅危疾保。現今女性嘅教育水平提高，壓力亦增加，好多時都會病早咗，希望為女士提供保障，如果到八十歲都健康，我哋仲有封利是送番畀佢哋。」

不經不覺，在保險界已打滾近二十年，說到這個行業最吸引之處，自認事業心重的Eleonore說：「保險係『人』嘅生意，買保險係對親人愛同負責任嘅表現，而且呢行不停轉變，會令人愈做愈後生，睇到好多新事物，自己亦會不斷進步。」

Eleonore's Profile

現　　職：大新人壽行政總裁

學　　歷：美國洛杉磯Loyola Marymount大學國際金融學士

曾任職公司：台灣南山人壽意外及健康保險部副總裁、美國友邦（上海）副首席業務執行官、廣州信誠人壽保險首席營銷業務官、英國保誠（香港）亞洲區業務發展總監、蘇黎世亞洲區人壽業務營運拓展主管

興　　趣：行山、旅遊、打網球

婚姻狀況：未婚