政情：梁高美懿極速試套裝
女強人唔易做，貴為恒生銀行副董事長兼行政總裁嘅梁高美懿就係一例，返工同公開活動搞到佢周身唔得閒，連改衫呢啲工作都要偷空去做。
上禮拜五下晝三點半經過太子大廈，見到梁太喺中環急行，由太子大廈一個箭步過咗遮打大廈，跟住穿過環球大廈，入咗一間實而不華嘅改衣舖，似乎之前梁太攞咗啲行政套裝去改，佢跟住喺舖內試咗三套分別為白色、淺粉紅同較花嘅套裝，然後一臉滿意咁畀錢離開。
呢個好多女士享受嘅過程，梁太卻只能夠喺二十五分鐘搞掂，然後Call司機接載，先去滙豐總行開會，然後再返恒生總行出席活動，夠晒行色匆匆。
