政情：港鐵競步賽遇環團踩場
港鐵將按可加可減機制加價消息傳出後，好多打工仔都感不滿。嚟緊嘅禮拜日，港鐵舉行一年一度嘅競步賽，一眾高層都會出席，今年加價就加出踩場客，事關環保團體環保觸覺計劃同日喺中環舉辦另類競步活動，仲要求港鐵考慮搵代替周松崗嘅新CEO人選時，要搵個有良心嘅人喎。
已有幾年歷史嘅港鐵競步賽聲勢愈嚟愈大，卻較少遇到團體踩場抗議。據舉辦另類競步活動嘅環保觸覺話，當日會喺立法會門外、向皇后像廣場方向集合，然後競步去特首辦，希望透過呢個一步一個腳印嘅活動，顯示人民力量，並趕走港鐵霸權。雖然係抗議、示威，主辦者都呼籲參加者着輕便運動裝，實行同港鐵競步賽分庭抗禮。