政情：李應生慳電撐LED照明
日本核輻射危機持續三個幾禮拜，對各階層嘅影響逐步浮現，好多人都反思能源使用策略。香港中藥聯商會永遠會長李應生（Tommy，圖）日前話，今次危機令大家明白，應該減排、減少用核電，好似佢已計劃喺旗下店舖推行LED照明系統，以節省用電，但裝設成本要十幾萬，要長期使用至可以追回成本。
講到業內情況，佢透露依家批發商已放慢出售日本海味，普遍行家都係依靠存貨維持生意，相信今次災難對佢哋行業嘅影響最少以年計。至於名貴嘅日本乾鮑魚前景，Tommy估計，即使日本東部全毀，相信以日本人首屈一指嘅製乾鮑魚技術，可以搬去其他較乾淨嘅水域重振聲威，但供應肯定會減少。
香港中藥聯商會永遠會長李應生（Tommy）