政情：阿涂夫婦推介石澳美食
石澳係香港一個好有風情嘅地方，唔少情侶都鍾意去嗰度拍拖。上個禮拜六，白鴿黨議員涂謹申就同老婆蘇麗芬入咗石澳，拍拖兼懷舊，估唔到有意外收穫添。
阿涂話，有成十年冇去過石澳，一切皆因佢唔識游水，所以就趁得閒同老婆去石澳走番轉，一場入到去，兩個人梗係順便搵啲地道嘢食吓啦，佢哋搵咗間叫張記小廚嘅飯店醫肚，發現嗰度嘅「鹹魚煎肉餅」好好味，佢話鹹魚同肉餅混為一體，肉餅係煎熟而唔係蒸熟，結果一試難忘。
阿涂仲話，張記嘅「滑蛋蝦仁」啲蝦大大隻唔在講，而且隻隻都好有鮮味，絕非雪藏蝦之流。兩味餸分別盛惠六十八蚊同七十蚊，算唔算貴實在見仁見智，但阿涂話嗰度亦有三十五蚊嘅套餐，有飯有湯，賣相唔錯，可以話係平有平食、貴有貴食。
阿涂兩公婆入石澳拍拖期間，發現咗美味又香口嘅鹹魚煎肉餅。
鹹魚煎肉餅